MESCC ho FDCH Despede Bolseiru Na’in 13 ba Kontinua Estudu iha Indonezia ho Malázia
Dili 21 agostu 2025. Ministru Ensinu Superiór, Siénsia no Kultura (MESCC), José Honório da Costa Pereira Jerónimo, hamutuk ho Diretor Ezekutivi Fundo de Desenvolvimento do Capital Humano, Júlio Aparício,realiza seremónia asina kontratu no despedida ho bolseiru na’in 13 ne’e sei ba kontinua estudu iha país Indonezia no Malazia. Serimónia ne’e realiza iha salaun enkontru Ministério Ensinu Superior Siénsia no Kultura, Colmera.
Bolseiru sira sei ba hala’o estudu ho nivel mestradu (S2) iha Indonézia , iha universidade sira hanesan Universitas Gadjah-Mada- Indonesia ho bolseiru na’in rua (2) iha area estudu Geographic Information System (GIS), Universitas Katolik Atma Jaya (Unika Atma Jaya) ho bolseiru na’in rua (2), iha area estudu Biotechnology no Ekonomia, iha Universitas Ciputra-Indonesia bolseiru na’in tolu (3) iha area estudu Management in Hotel Tourism and Service Concentration, no iha nasaun Malázia bolseiru na’in neen (6) ne’ebé sei hala’o estudu iha Universiti Kuala Lumpur Malaysia (UniKL) iha area estudu sira hanesan; Business Administration, Business Administration (Entrepreneurship) no Management in Tourism
.
Ministru Ensinu Superiór, Siénsia no Kultura (MESCC), José Honório da Costa Pereira Jerónimo, hatete programa bolsa estudu ida ne’e, nu’udar preparasaun rekursus umanus etratéjiku Timor-Leste nian, ne’ebe ita hotu hatene iha tempu besik Timor-Leste sei sai membru ASEAN no perparasaun rekusu umanu ba futuru instalasaun politékniku turizmu no otelária iha Munisipiu Lautem.
Diretor Ezekutivu FDCH, Júlio Aparício hato’o parabéns ba bolseiru sira no hato’o mensajen hodi motiva bolseiru sira ho lia-fuan xave tolu hanesan “Imi mak reprezenta, Imi mak espesial no Imi mak murak Timor nian”.
“Imi reprezenta rai Timor ba iha mundu internasional liu husi akademiku, hatudu imi nia nasionalizmu, katak imi espesial iha area estudu ne’e, hatudu ba sira imi mak murak rai Timor nian no imi mós bele kompete iha mundu akademiku,” hateten DE FDCH
DE subliña, ami prepara imi hodi sai fini di’ak ba futuru Timor nian, tan imi sei sai kontinuador no imi povu Timor nia esperansa no murak rai, tan ne’e ami husu ba imi atu bele termina imi nia estudu ho kualifikadu ne’ebé diak hodi fo kontribuisaun ba ita nia rai doben Timor-Lorosa’e,”
Iha seremónia ne’e Ministru José Honório da Costa Pereira Jerónimo hato’o mós apresiasaun ba ekipa júri no entrega mós sertfikadu ba ekipa juri na’in sia(9) ne’ebé kompostu husi dirijente sira husi Instituisaun tuteladu sira MESCC nian hanesan INCT, ANAAA, UNTL no reprezenta husi S-FDCH, ne’ebé ho didikasaun di’ak hodi bele halo selesaun ho transparansia hodi hetan kandidatu ne’ebé kualifikadu. (Média_FDCH)