FDCH Estabelese Protokolu Kooperasaun ho Universidade de Coimbra Portugal

Coimbra- 16 Juñu 2025. Diretór Ezekutivu Fundo de Desenvolvimento do Capital Humano (FDCH), Júlio Aparício reprezenta Prezidente Conselho Administrção do FDCH, Eng. Gastão Francisco de Sousa asina ona Protokolu Kooperasaun ida Proreitór Universidade de Coimbra, João Nuno Calvão da Silva.

Objetivu husi estabelesimentu protokolu kooperasaun ne’e atu servisu hamutuk iha implementasaun programa bolsa estudu liu-liu formasaun rekursu umanu Timor-Leste nian iha area Direitu ne’ebé organiza husi Gabinete Primeiru Ministru liu husi Grupu Traballu Reforma Setór Justisa no hetan fiansiamentu husi Orsamentu FDCH.
Partisipa iha serimónia estebelsimentu protokolu koooperasaun ne’e aleinde DE FDCH ho proreitor Universidade Coimbra partisipa mós husi, Koordenadóra Grupu Traballu ba Reforma Setór Justisa, Lúcia Lobato, Koordenadora Servisu Administrasaun Finansas (SAF-S-FDCH), Anastacia do Espirito Santo, Xefe Unidade Bolsa Estudu, Josefina Goncalves do Nascimento, Diretora Adjunta husi Fakuldade Direitu Universidade de Coimbra, Sandra Passinhas, Segundu Sekretáriu Embaixada Timor-Leste iha Portugál, Domingas Guterres da Silva Oliveira no Adidu Edukasaun, Mafalda Lopes da Silva, nune’e mós Koordenadór Jerál no Administradór Akadémiku Timorense Coimbra nian (ATC), Crisogno de Deus, Xefe Divizaun Relasaun Internasionál UC, Silvia Silva Dias, no membru delegasaun vizitante sira seluk.

Tuir planu iha tinan ne’e Grupu Traballu Reforma Setór Justisa sei halo rekrutamentu ba bolseiru iha area Direitu ho vaga hamutuk 50 ne’ebé sei koloka ba hala’o estudu iha universidade koñesidu sira iha Portugal. (Média_FDCH)