FDCH Despede Bolseiru Méritu Na’in 15 Hodi ba Kontinua Estudu iha ATMI-Surakarta

Dili, 04 Jullu 2025. Ministériu Planeamentu no Investimentu Estratéjiku (MPIE) liu-husi Sekretariado Fundo de Desenvolvimento do Capital Humano (S-FDCH) realiza serimónia despedida ho Bolseirus Bolsa Méritu hamutuk na’in 15 ne’ebé sei ba kontinua sira ninia estudu iha Akademi Teknik Mesin dan Industri (ATMI Surakarta- Indonesia) iha área ejeñaria manufaktura, mekanika no enjeñaría industrial ho nivel estudu Diploma IV.

Serimónia despedia ne’ebé realiza iha Salaun Delta Nova ne’e, partisipa direita husi Ministru Planeamentu no Investimentu Estratéjiku (MPIE) núdar Prezidente Conselho Administração-FDCH, Eng. Gastão Francisco de sousa, Ministru Ensiñu Superior Siensia no Kultura (MESCC), José Honorio da Costa Pereira Jeronimo, (membru CA-FDCH), Diretor Ezekutivu FDCH, Júlio Aparício, Adjuntu Diretor, Rogerio Inacio S. M. Lay, Kargu Koordenadores no xefia unidade sira husi S-FDCH, no inan aman bolseiru sira.
Prezidente CA-FDCH, Eng Gastão Francisco de Sousa orgullu ho programa bolsa estudu Méritu tanba bolseiru selesionadu sira mai husi eskola Sekund’ariu Jerál no Tekniku Vokasionál sira iha Munisipiu, maske nune’e husu nafatin ba bolseiru sira atu konsentra iha estudu no finaliza tuir tempu hodi fila mai kontribui fali matenek ne’ebé durante hetan iha estudu ba dezenvolvimentu Timor-Leste.

“Ha’u husu ba ha’u nia-oan sira ita-boot sira husi nasaun ida ba nasaun seluk, ha’u deseza atu ita boot sira estuda maka’as hodi fila mai apoiu ita nia dezenvolvimento nasaun nian, iha tinan oin sei bele haruktan ba, maibe depende ba ita boot sira, ita boot sira mak sai hanesan ezemplu,”

Iha oportunidade hanesan Ministru MESCC, José Honorio da Costa Pereira Jeronimo hateten investimentu iha rekursus umanus iha area ejeñaria importante tebes, alinea mós ho Timor-Leste ninia adezaun ba ASEAN tanba ne’e politíka IX Governu hakarak hasa’e kualidade rekursus umanus iha Timor Leste.

Diretór Ezekutivu FDCH, Júlio Aparício, hateten bolseiru sira ne’ebé aban loron Sabadu 05 Jullu 2025 atu dezloka ba hala’o sira ninia estudu iha ATMI mai husi estudante Mellores Kualifikadu ne’ebé selesiona husi munisipiu hotu ne’ebé ekipa tékniku S-FDCH tun direita ba foti dokumentus finalista sira hamutuk 480 maibé iha faze selesaun iha na’in 50 mak selesionadu bazeia ba kriteria husi ATMI tanba kritéria ida atu hala’o estudu iha eskola Jezuita nian, valor matematika tenke 8.5 no labele iha moras ruma maibé iha diskusaun ATMI konkorda hodi hatun valor ba 8.0 nune’e bolseiru kandidatu hamutuk 35 mak konkore hodi partisipa iha teste ne’ebé hala’o direita husi ATMI no selesionadu bolseiru na’in 15.
Bolseira Novenencia Apriliana da Costa Ximenes ne’ebé reprezenta bolseiru sira hato’o agradesimentu profundu ba Governu no kompremetidu atu finaliza estudu tuir kontratu ne’ebé selebra ona ho Governu liu husi FDCH.

“Ivestimentu ida ne’e nudar kuda fini ba ami no ba futuru Timor-Leste, Ami kompremetidu katak oportunidade ida ne’e ami konsidera hanesan knar no responsabilidade ida ba ami husi governu Timor-Leste, ho ida ne ami tenke estuda maka’as hodi finaliza estudu tuir kontratu ne’ebé asina ona ho Governu liu husi FDCH,” hateten reprezentante Bolseiru
Reprezentante Inan Aman Vitorino da Costa, hanesan reprezentante inan aman, lori familia no bolseiru nia naran hato’o obrigadu no agradese wain ba Governu da-sia (IX) ne’ebe lidera husi Primeiru Ministru Kay Rala Xanana Gusmão, Ministru Planemantu Investimentu Estratéjiku nu’udar prezidente Konsellu Administrasaun FDCH ho membru permantete sira CA-FDCH nian no Diretór Ezekutivu FDCH, Júlio Aparício ne’ebé atribui bolsa estudu méritu ba estudante melores kualifikadu sira husi Munisipiu hotu no RAEOA.

Prosesu selesaun ida ne lao duni ho transparansia tanba FDCH entrega tomak ba ATMI no rezultadu de’it mak entrega ba FDCH hodi fo sai ba publiku.
Bolseiru sira ne’e selesionadu liu husi teste sira hanesan; Academic potential Test, Capability Test, Basic engineering skills test, Macquarria Test no ikus liu entrevista ba kandidatu sira ne’ebé hala’o direita husi ekipa husi ATMI iha Dili iha loron 22 abril 2025.