Home Fellowship Farewell
Dili, 13 Setembru 2024. Governu liuhusi Ministériu Planeamentu no Investimentu Estratéjiku (MPIE) ho Fundo de Desenvolvimento do Capital Humano (FDCH) realiza serimónia despedida ho bolseirus programa Bolsa Merito FDCH 2024 hamutuk na’in 92 ne’ebé sei dezloka ba hala’o sira ninia estudu iha nasaun lima hanesan; Portugal, Brazil, Indonézia, Malázia no Tailándia, iha salaun Delta Nova.
Partsipa iha serimónia despedia ne’e Ministru Planeamentu no Investimentu Estratéjiku no Prezidente Konsellu Administrasaun FDCH, Eng. Gastão Francisco de Sousa, Ministru Ensinu Superior Siensia no Kultura, José Honório da Costa Pereira Jerónimo (Membru Permanente ba CA-FDCH), Ministru Justisa, Sérgio de Jesus Fernandes da Costa Hornai (Membru permanente CA-FDCH), Ministru Petroliu no Rekursus Minerais, Francisco da Costa Monteiro(Membru permanente CA-FDCH) no Sekretariu Estadu Komunikasaun Sosiál, Expedito Dias Ximenes, Embaixador Malázia ba Timor-Leste, Embaixador Cuba ba Timor-Leste, Reprezentante Embaixador Brazil ba Timor-Leste, reprezentante husi embaixador Indonesia ba Timor-Leste, Prezidente Komisaun Funsaun Publika no inan aman bolseiru sira.
Diretór ezekutivu FDCH, Júlio Aparicio hatete husi bolseiru selesionadu 92 ne’e, bolseiru na’in 21 sei ba kontinua sira nia estudu iha Portugal ho nivel estudu Doutoramentu na’in 4 no Mestradu na’in 17, iha Brazil bolseiru na’in 14 sei kontinua sira nia estudu ho nivel estudu Mestradu , iha Indonézia bolseiru na’in 16 sei kontinua sira nia estudu ho nivel lisensiatura, iha Malázia bolseiru na’in 31 sei kontinua sira nia estudu iha nivel lisensiatura na’in 18 no mestradu na’in 13 no iha Tailándia bolseiru na’in 10 sei hala’o sira nia estudu ho nivel mestradu.
Bolseiru sira sei hala’o estudu iha area estratéjiku haktuir ba prioridade no nesesidade nasaun nian hanesan; saúde, edukasaun, direitu ejeñaria no turizmu.
Ministru Planeamentu no Investimentu Estratéjiku no Prezidente Konsellu Administrasaun FDCH, Eng. Gastão Francisco de Sousa, hatete ohin markatan pasu importante ida ba iha ita nia país ho bolseiru sira ne’ebé sei ba hala’o sira ninia estudu iha país sira hanesan Portugal, Brazil, Indonézia, Malázia no Tailándia.
Bolseiru sira sai hanesan ezemplu ida ba juventude sira seluk iha Timor-Leste ho nune’e husu ba bolseiru sira atu eskola ho di’ak hodi finaliza estudu ho di’ak nune’e fila mai bele kontribui fali ba dezenvolvimentu nasaun nian tuir ida idak nia area.
Bolseiru hirak ne’e selesionadu liu husi prosesu teste meritu ne’ebé FDCH realiza fazeada ho kooperasaun husi parseiru sira no ekipa júri ne’ebé kompostu husi FDCH, Ministériu Planeamentu no Investiemtnu Estratéjiku no Ministériu Ensinu Superior Siensia no Kultura. (Média-FDCH)