Dili, 29 Agostu 2024, Diretór Ezekutivu ba Fundo de Desenvolvimento do Capital Humano (FDCH), Júlio Aparício  ho Xefe Ezekutivu Education Malaysia Global Services (EMGS), En Novie Tajuddin asina ona akordu kooperasaun iha programa bolsa estudu no formasaun ne’ebé sei fó oportunidade ba timoroan sira ba hala’o estudu no formasaun iha  Malázia.

Akordu kooperasaun ne’e estabelese iha ámbitu vizita Vise-Primeiru Ministru,  Ministru Dezenvolvimentu Rurál no Rejionál Malázia, The Honorable Dato’ Seri Dr. Ahmad Zahid Bin Hamidi (Zahid Hamidi) mai Timor-Leste no iha okaziaun hasoru malu ho Vise-Primeiru Ministru, Ministru Kordenadór Assuntu Sosiál, Eng. Mariano Assanami Sabino, iha Gabinete Vise Primeiru Ministru II, Palacio do Governo.

Iha tempu besik bolseiru FDCH ne’ebé pasa ona iha programa bolsa estudu méritu hamutuk na’in 31, Lisensiatura 19 no Mestradu 12, sei dezloka ba Malázia hodi hala’o sira nia estudu iha Universiti Tecnologi Petronas (UTP) no Asia Pacific University of Technology & Innovation.

Ho kooperasaun ne’ebé estabelese ona sei haklean liu tan servisu hamutuk  entre Sekretáriadu Fundo de Desenvolvimento do Capital Humano ho Education Malaysia Global Services, iha programa bolsa estudu no formasaun hodi kontribui ba dezenvolvimentu rekursus umanus ne’ebé ho kbi’it maka’as iha setór oi-oin  haktuir ba prioridade  IX Governu nian.

(Média-FDCH)