ATMI Simu Ho Orgullu Bolseiru Bolsa Méritu FDCH 2025 Na’in 15

Surakarta, 06 Jullu 2025. Diretór Adjuntu, Fundo de Desenvolvimento od Capital Humano, Rogerio Inacio S. M. Lay, ofisialmente entrega bolseiru bolsa méritu na’in 15 ba Diretór Akademi Teknik Mesin dan Industri (ATMI) Surakarta- Idonesia Dr., Ir. Andreas Sugijopranoto, M. Sc., SS ho ekipa hodi kontinua sira ninia estudu iha instituisaun ensinu superior Jezuita ne’e ho nivel estudu Diploma IV iha área téknika, indústria no manufaktura.

Hafoin simu bolseiru sira, ekipa husi ATMI kontinua kedas halo aprezentasaun kona-ba perfil instituisaun nian no fasiliade sira ne’ebé instituisaun ensiñu superior ne’e iha hodi fasilita estudante sira hala’o pratika durante sira hala’o sira ninia estudu.

ATMI harii husi Jezuita sira maibé nakloke no simu ema hotu hodi hala’o estudu bazeia ba misaun atu eduka foin-sa’e sira atu nune’e sira bele hala’o papél ida hodi harii indústria no edukasaun vokasionál ne’ebé sustentável iha Indonézia no mundu internasionál.

Ekipa ne’ebé akompaña bolseiru sira dezloka ba Surakarta Indonézia kompostu husi Diretór Adjuntu, Rogerio Inacio S. M. Lay, Koordenador Servisu Assesoria Téknika Juridika no Administrativa (SATJA-S-FDCH), Assesor ITC-S-FDCH, Ivo Juvito Belo, no Tékniku, Januario Nuno dos Reis Gomes. (Média_FDCH)