Governu Despede Bolseiru Bolsa Meritu na'in 146
Dili, 26 setembro 2025. Governu da-sia (IX) liu-husi Ministériu Planeamentu no Investimentu Estratégico (MPIE) no Fundo de Desenvolvimento do Capital Humano (FDCH) marka-tan istória foun ida iha prosesu dezenvolvimentu rekursus umanu Timor-Leste nian hodi realiza serimónia despedida ho bolseiru foun bolsa méritu FDCH, hamutuk na’in 146 ne’ebé sei ba kontinua sira nia estudu iha universidade koñesidu sira iha Indonézia, Malázia, Portugal no Brazil.
Sermónia despedida ho bolseiru sira ne’e partisipa direita husi Primeiru Ministru Kay Rala Xanana Gusmão, Ministru Planemantu Investimentu Estratejiku (MPIE) nuudar Prezidente Konsellu Administrasaun FDCH, Eng. Gastão Francisco de Sousa, Ministru Ensinu Superior Siénsia no Kultura (memebru Konsellu FDCH), José Honório da Costa Pereira Jerónimo, Sekretáriu Estadu Ensinu Sekundáriu Jerál no Ensinu Sekundáriu Tekniku-Vokasionál Domingos Lopes Lemos, Sekretáriu Estadu Arte no Kultura, Jorge Soares Cristovão, Diretór ezekutivu FDCH, Júlio Aparício, Diretór Adjuntu Rogério Inacio S. Miranda Lay, kargu koordenadores, Xefe Unidade sira S-FDCH nian, Diplomata sira husi páis destinadu bolseiru, inan aman no bolseiru sira.
Iha Indonézia bolseiru hamutuk na’in lima nulu (50), bolseiru na’in 30 konsentradu hala’o estudu iha area aeroportu nian ho programa estudu dilpoma tres, no bolseiru na’in 20 seluk ho programa estudu Lisensiatura no mestradu iha area estudu sira hanesan; Ship Operations Engineering Technology, Port Management and Maritime Logistics, Etnomuzicologia, Art Managemen, Arte Espetákulu, Belas- Arte, Business Travel Management.
Iha Malázia Bolseiru foun hamutuk limanulu-resin-lima (55) ho programa estudu lisensiatura no mestradu ne’ebé sei hala’o estudu iha area sira hanesan; Software Development, Internacional Business and Management, Psychology, Multimedia Animation, Immersive Media Design, Biomedical Science, Nutrition, Mecatronics Engenineering, Electrical Engineering Technology (Industrial Power), Artificial Inteligence, Water Engineering and Energy, Science with Honours in Industrial Chemistry, Oil and Gás Engineering no Civil Engineering.
Iha Portugal bolseiru foun hamutuk na’in hitu (7) ho programa estudu Mestradu no Doutoramentu ne’ebé sei hala’o estudu iha area estudu sira hanesan; Matematika, liangua portugeza (Linguistika), Lingua Portugues não materna, enfermajen no medisina.
Iha Brazil bolseiru foun sira hamutuk na’in tolu nulu resin-haat (34) ho porgrama estudu hahú husi Lisensiatura, Mestradu to’o Doutoramentu, area estudu sira ne’ebé bolseiru hala’o estudu ba mak hanesan; bolseiru sira husi dosente universidade no instituisaun ensinu superior iha area sira hanesan; Matemátika, Economia Aplicada (agro-economia), Fízika, Ciências Farmacêuticas (Farmácia), Ciências Biológicas (Microbiologia), Enjenaria. Produsaun, Saúde no Nutrisaun, Edukasaun, Biotéknolojia no Enfermajen, entretantu bolseiru bolsa méritu hal’ao sira nia estudu iha area sira hanesan; Gestão de Agro-Negócio, Engenharia de Alimentos, Engenharia Agrícola e Ambiental, Engenharia de Agrimensura e Cartográfica, Cooperativismo – área agrícola, Ensino da Química no Ensino da Matemática.
Bolseiru foin-sa’e hirak ne’e nu’udar investimentu estratéjiku governu da-sia (IX) nian iha dezenvolvimentu rekursus umanus hodi prepara joven sira atu reforsa dezenvolvimentu Timor-Leste, iha setór importante oi-oin haktuir ba planu no prioridade nasionál iha futuru. (Média_FDCH)