FDCH-ATMI Estabelese Akordu Tékniku hodi Simu Bolseiru Timoroan

Dili, 23 Abril 2025. Diretór Ezekutivu Fundo de Desenvolvimento do  Capital Humano (FDCH), Júlio Aparício asina akordu tékniku ho Diretor Politeknik Akademi Teknik Mesin Surakarta (ATMI). Dr., Ir. Andreas Sugijopranoto, M. Sc., SS,  iha gabinete Diretór Ezekutivu,  Colmera Dili.

Objetivu estbelesimentu akordu tékniku FDCH ho ATMI mak atu servisu hamutuk iha dezenvolvimentu rekursu umanu Timor-Leste nian liu-liu simu timoroan sira ne’ebé hetan bolsa estudu husi FDCH hodi kontinua estudu  iha área espesifiku sira hanesan manufatura, mekanika no enjeñaría industrial iha instituisaun ensinu superior Indonézia nian ne’ebé lokaliza iha Sentral Java.

Diretór Ezekutivu FDCH hatete, ho akordu tékniku ne’ebé estabelese ona iha tinan ne’e ATMI sei simu uluk timoroan hamutuk na’in 15 ne’ebé selesionadu husi teste ne’ebé realiza direita husi ekipa ATMI hodi ba hala’o estudu iha área ejeñaria manufaktura, mekanika no enjeñaría industrial ho nivel estudu Diploma IV no fiar katak sei aumenta iha tinan oin.

Timoroan sira ne’ebé sei ba hala’o estudu iha ATMI sei sai profisionál no  kompetente iha ne’ebé sei bele kontribui maka’as  ba dezenvolvimentu nasionál liu husi harii indústria lokál no  setor privadu hafoin termina sira ninia estudu no fila mai Timor-Leste.

Diretór ATMI Surakarta,  Dr., Ir. Andreas Sugijopranoto, M. Sc., SS  hatete ATMI nu’udar sentru exelénsia iha ensinu vokasionál ne’ebé inovativu, adaptativu, lori mudansa pozitivu ba mundu industriál no vokasionál, tanba ne’e orgullu bele hetan konfiansa husi Governu Timor-Leste liu husi FDCH hodi bele  hola parte iha apoiu dezenvolve rekursu umanus Timor-Leste nian.

“ATMI harii husi Jezuita sira maibé nakloke no simu ema hotu hodi hala’o estudu bazeia ba  misaun atu eduka foin-sa’e sira atu nune’e sira bele hala’o papél ida hodi harii indústria no edukasaun vokasionál ne’ebé sustentável iha Indonézia no mundu internasionál,” hateten nia

Iha oportunidade hanesan ekipa ATMI entrega mós rezultadu teste ba kandidatu na’in 35  ne’ebé partisipa ona iha  selesaun atu hetan bolsa estudu husi FDCH hodi kotniua sira ninia estudu iha ATMI no iha rezultadu ne’e kandidatu na’in 15 mak selesionadu .

Partisipa iha atividade estabelesimentu akordu tékniku ne’e aleinde DE FDCH ho Diretór ATMI, partisipa mós husi Adjuntu Diretor , Vise Diretór I ATMI ho ekipa no  kargu koordenadores no xefia sira FDCH nian. (Média_FDCH)