CA-FDCH Aprova Área Estudu Estratéjiku ba Programa Bolsa Estudu 2025

Dili, 17 Marsu 2025. Conselho Administração Fundo de Desenvolvimento do Capital Humano (CA-FDCH), realiza reuniaun ba dala-36 hodi halo diskusaun no aprovasaun ba área estudu estratéjiku iha programa bolsa estudu mellores kualifikadu  no bolsa estudu ba publiku ne’ebé sekretariadu FDCH aprezenta.

Reuniaun CA-FDCH ne’e prezide direita husi Ministru Planeamentu no Investiementu Estratéjiku núdar Prezidente CA-FDCH, Eng. Gastão Francisco de Sousa no partisipa husi Ministru Ensinu Superior Siénsia no Kultura, José Honorio da Costa Pereira Jeronimo (membru),  Ministra Finansas, Santina José Rodrigues F. Viegas Cardoso (membru), Ministru Justisa, Sérgio de Jesus Fernandes da Costa Hornai (membru) no Ministru Petroléu no Rekursu Minerais, Francisco da Costa Monteiro (membru). Diretór Ezekutviu FDCH, Júlio Aparício,  Adjuntu Diretór, Rogerio Inacio S. M. Lay,  Koordenadora Gabinete Reforma Setór Justisa Lucia Lobato, kargu koordenadores no xefia balun husi sekretariadu FDCH.

Hafoin aprezentasaun husi Diretór Ezekutivu FDCH, Júlio Aparício  ho Koordenadór Servisu Tékniku ba Opersaun Fundu (STOF), Atanásio Soares,  Prezidente CA-FDCH ho membru sira halo diskusaun no  apresiasaun hodi aprova área estratéjiku sira ne’ebé aliñea ho prioridade Governu da-sia nian  ne’ebé FDCH sei implementa iha programa bolsa estudu iha tinan 2025 mak hanesan; área Enjeñaria, Siénsia Agraria, Siénsia Sosiál  Aplikada  no  Siénsia Saúde.

Tuir planu iha tinan ne’e Sekretariadu FDCH sei atribui bolsa estudu ba estudante mellores kualifikadu  husi eskola sekundariu no tékniku vokasionál ho vaga hamutuk 100, ho nivel estudu lisensiatura (S1) no bolsa estudu ba públiku em jeral ho vaga 21 ho nivel estudu mestradu  (S2).  Nasaun sira ne’ebé prefere bolseiru sira atu ba hala’o estudu mak hanesan ; Indonézia, Malazia no Brazil.(Média_FDCH)