FDCH Asina Memorando de Entendimento ho Universidade Lima iha Indonézia

Jakarta 05 Marsu 2025. Diretór Ezekutivu Fundo de Desenvolvimento do Capital Humano FDCH, Júlio Aparício asina Memorando de Entendimento ho Reitor husi Universidade lima, ne’ebé asiste direita husi Sua Exélensia Ministru Ensinu Superior Siensia no Kultura Dr. José Honorio Pereira Jerónimo, Embaixador Timor-Leste ba Indonézia, Roberto Sarmento de Oliveira Soares no diplomata sira, iha Embaixada Timor-Leste nian iha Indonézia.

Universidade lima ne’ebé asina akoordu kooperasaun ho FDCH mak hanesan: Universitas Gadjah Mada (UGM), Universitas Katolik Atma Jaya, Universitas Mercu Buana, Universitas Borobudur no Politeknik ATMI Surakarta.

Ministru Ensinu Superior Siensia no Kultura Dr. José Honorio Pereira Jeronimo hatete ho memorando de Entendimentu ne’ebé estabelese nu’udar apoiu ida husi universidade lima ne’e ba Timor-Leste no nu’udar mós xave hodi hasa’e sistema edukasaun ensinu superior atu prepara jerasaun foun sira ba dezenvolvimentu rekursus umanus Timor-Leste ida ne’ebé sustentavel.

Embaixador Timor-Leste ba Indonesia Roberto Sarmento de Oliveira Soares hateten ohin marka tan momentu no marku importante ida iha ita-nia kompromisu hamutuk atu avansa iha edukasaun, promove dezenvolvimentu rekursu umanu no hametin relasaun entre ita-nia instituisaun sira no Governu Timor Leste ho Indonézia.

“Kolaborasaun ne’ebé ohin ita asiste la’ós de’it signifika parseria entre instituisaun rua, maibé mós aliñamentu vizaun ida ne’ebé fahe ba futuru ida ne’ebé nabilan liu ba povu Timor-Leste,”

FDCH hala’o ona knaar importante ida hodi hasa’e asesu ba oportunidade edukasionál sira no hodi halo parseria ho Universidade iha ne’e ohin, ami iha konfiansa katak ami sei hadi’a liután kualidade edukasaun no kria dalan ida ba foin-sa’e sira atu sai líder futuru nasaun Timor-Leste nian.(Média_FDCH)