Dili, 19 Fevereiru 2025, Embaixador Rusia ba Indonézia no Timor-Leste, Sergei Tolchenov ho ninia delegasaun, realiza enkontro kortezia ho Diretór Ezekutivu FDCH, Júlio Aparício ne’ebé akompaña husi Diretór Adjuntu, Rogerio Inacio S. Miranda Lay, Koordenador Servisu Tékniku Operasaun Fundu, Atanásio Soares, Koordenadora Servisu Administrasaun Finansas, Anastasia do E. Santo, Koordenador Servisu Asesoria Juridika Téknika Juridika no Administrativa, Hermengildo da Silva, Xefe Unidade Jestaun Rekursus Umanus, Virgilio Ramos no Xefe Unidade Bolsa Estudu, Josefina Goncalves do Nascimento iha Hotel Novo Turismo.

Embaixador Rusia ba Indonesia no Timor-Leste, Sergei Tolchenov aprezenta programa bolsa estudu oi-oin ne’ebé Governu Rusia tinan-tinan atribui ba nasaun sira ne’ebé sei dezenvolve hela hanesan iha Afrika no sudeste aziatiku hodi kontinua sira ninia estudu tanba edukasaun no dezenvolvimentu ba rekursus umanus ne’e importante tebes nune’e, sujere atu timoroan sira bele aplika mós ba bolsa estudu ne’ebé Governu Rusia loke-tinan tinan.

Diretór Ezekutivu FDCH, Júlio Aparício apresia ho enkontru dahuluk ne’ebé FDCH hala’o ho Embaixadór Rusia ho ninia delegasaun no iha komitmentu atu kontinua nakaloke iha diskusaun hodi estabelese kooperasaun ho instituisaun relevante hodi fó oportunidade ba timoroan aplika ba bolsa estudu ne’ebé Rusia atribui tinan tinan.

Enkontru kortezia ne’e termina ho troka prende no tara tais husi parte rua nu’udar simbolu amijade hodi bele hametin liutan kooperasaun iha futuru liu-liu iha implementasaun programa bolsa estudu.(Média_FDCH)