FDCH Estabelese MoU ho APU no EMGS Malazia

Diretór Ezekutivu Fundo de Desenvolvimento do Capital Humano (FDCH), Júlio Aparício halo vizita servisu ba nasaun Malázia hahú husi loron  23- 30 novembru  2024 hodi asina Memorandum of Understanding (MoU) ho Diretór Ezekutivu Asia Pacific University of Technology & Innovation (APU) ), Datuk Parmjit Singh no Xefe Ezekutivu  Education Malaysia Global Services (EMGS), Novie Tajuddin.

Objetivu husi estabelesimentu MoU ho APU no  EMGS hodi serivu hamutuk iha parte dezenvolvimentu kapital umanu Timor-Leste nian liu-liu iha programa bolsa estudu ne’ebé FDCH implementa, tinan-tinan FDCH sei haruka timoroan sira ne’ebé hetan bolsa estudu ba hala’o sira ninia estudu iha país Malázia.

Iha oportunidade hanesan Diretór Ezekutivu ho ekipa partisipa mós iha Festival of Ideas (FOI) and MOU exchange program ne’ebé realiza iha Putrajaya PICC,  hodi troka MoU ne’ebé FDCH ho  EMGS asina ona ho  hetan sasin husi Ministru Ensinu Superior Malázia Datuk Zambry Abdul Kadir  no Embaixadór Timor-Leste ba Malázia Lizualdo Gaspar.

Iha vizita ne’e Diretór Ezekutivu ho delegasaun halo mós enkontru ho bolseiru bolsa méritu FDCH nian no timoroan sira ne’ebé eskola ho finansiamentu rasik ne’ebé akompaña husi Embaixadór  Timor-Leste ba Malázia,  Lizualdo Gaspar no pesoál embaixada nian tomak hodi demostra kona-ba papel FDCH no meta sira ne’ebé FDCH atu atinje liu-liu iha dezenvolvimentu kapitál umanu Timor-Leste nian.

Iha tinan ne’e bolseiru FDCH na’in 9 mak hahú kontinua uluk sira nia estudu  ho nivel estudu lisensiatura na’in 6 no mestradu na’in 3, iha area estudu sira hanesan engenharia mecatronica,  Artificial Intelligence, Computer and Analytics Science, and Finance iha APU.

APU nu’udar universidade ne’ebé ho vizaun atu sai universidade líder ida iha téknolojia no inovasaun ne’ebé transforma estudante sira sai profisionál no kompetente iha futuru.